(Әкият)

Борын заманда ук аккан
Идел исемле елга.
Мул сулы булганга күрә,
Ташыган ди ул ел да.

Якын – тирә басуларны
Болыннарны сугарган.
Бабайлар бик рәхмәтле
Булганнар ди шуңарга.

Идел үзе генә түгел,
Байтак ди туганнары.
Бер – берсенә кунак булып
Йөрешә торганнары.

Шулай да Чулман дигәне
Бик абруй казанган.
Ерак та акмаган үзе
Башкалабыз Казаннан.

Чулман белән Идел һәрчак
Дус һәм тату булганнар.
Кешеләр шуны күргәннәр,
Сусаклагыч корганнар.

Кече туган Казансу да
Инде күптән җыенган.
Шушы хәлләрне күргәч тә,
Ул Иделгә сыенган.

Сусаклагыч та төзелгәч,
Дуслык чәчәк аткан, ди.
Көчләре дә артып киткән,
Кешеләр шак каткан, ди.

Идел буендагы Казан
Әйләнгән ди зур портка.
Якын – тирә бар күршеләр
Сокланган Идел – йортка.

Нократ дигән бер туганы
Тыныч кына аккан, ди.
Иң матур җирләрне сайлап,
Үзенә юл сапкан, ди.

Болыннарында кешеләр
Җиләк җыйган, мал көткән.
Анда балык та тотканнар,
Зур – зур кораблар үткән.

Элегрәк елгаларны
Салларда кичкәннәр, ди.
Бер ярдан икенчесенә
Бик озак күчкәннәр, ди.

Хәзер бу елгалар аша
Зур күперләр салынган.
Юллар якты булсын өчен,
Лампочкалар кабынган.

Елагалар бүген дә әле
Ага да ага икән.
Дулкыннары ярларына
Кага да кага икән.

Акчарлаклар элеккечә
Очып, балык аулый, ди.
Туган якның елгаларын
Ташлап китә алмый, ди.