Игелекле гамәл кылынды

22 нче сентябрь көнне Түреш авылы зиратында өмә оештырылды. Аннан соң «Харрас чишмәсе» янында районның ветераннар советы рәисе Илгиз Низамов барлык авыл халыкы өчен Корбан ашы үткәрде.

50 елдан соң очрашу

30 нчы июнь көнне 1968 нче елда Күбәк урта мәктәбенең 10а,б,в сыйныфларын тәмамлаучылар очрашты.Сыйныфташлар очрашуына тиешле шартлар тудырганы өчен, мәктәп дирекциясенә тирән рәхмәт хисләребезне җиткерәбез.

50 елдан соң очрашу

 

Уйнап – көлеп йөри идек

Сыйныфташларым белән,

Менә бүген басып торам

Ап – ак башларым белән.

Ак баш миндә генә булса,

Кайгырып йөрер идем.

Кешегә күрсәтмәс өчен,

Чарасын күрер идем.

Мөстәкыймнең дә бит әнә

Чәчләренә чал кергән.

Югыйсә гомер буена

Тик газ тикшереп йөргән.

Үткән дә киткән 50 ел,

Сизмичә дә калганбыз.

Ярый әле табигатьтән

Яшәү көче алганбыз.

Ни кызганыч, яшьтәшләрнең

Иртә китте байтагы.

Берүк андый кайгы – хәсрәт

Кабатланмасын тагы.

Әби – бабайлар инде без,

Абый – апалар түгел.

Ә шулай да ни өчендер

Картая белми күңел.

Күңел картаймасын инде,

Ул да картайса яман.

Оныкларыбызны сөеп

Яшисе килә һаман.

Яшисе килә куанып,

Сау һәм сәламәт булып.

Дус – ишләрне сөендереп,

Бары игелек кылып.

Байлык юк, дип уфтанмыйбыз,

Килсә, кире кумыйбыз.

Ләкин аңа буйсынмыйбыз,

Байлык колы булмыйбыз.

Яшьтәшләрем, дус  — ишләрем,

Сыйныфташларым минем,

Сезгә иң изге хисләрем,

Теләкләр алып килдем.

Барыгызга да телим мин

Бәхетле картлык кына.

Кичерергә язсын безгә

Куаныч, шатлык кына.

Оныкларның туйларын да

Күрергә насыйп булсын.

Барыр юллар, эшләребез,

Ниятләребез уңсын.

Бүген монда килгәннәргә

Рәхмәтләр яусын иде.

Киләчәктә тагын шундый

Бәйрәмнәр язсын иде.

30.06.2018.

Кабер ташы яңартылды

7 нче май көнне Дусай  авылы зиратында сугышчан Дан орденнарының тулы кавалеры Бәдыйк Салихов каберенең яңартылган ташын ачу тантанасы булды.Анда Мөслим  муниципаль район башлыгы Рамил Хәмзә улы Муллин, җирле үзидарә әгъзалары, Бәдыйк Салиховның туганнары , авылдашлары, хәрбиләр, җәмәгатьчелек вәкилләре һәм башка кунаклар катнашты.

«Данлы Дусай»

Шушы көннәрдә Казанның «Иделпресс» басмаханәсендә Мөҗәһит Әхмәтҗанов авторлыгында Мөслим районы Дусай авылы тарихы, топонимнары, тарихи фоторәсемнәр, авыл йортлары, кайбер нәсел шәҗәрәләре, шул авылдан чыккан күренекле һәм кызыклы шәхесләрнең тормыш юллары, эшчәнлекләре, иҗатлары яктыртылган «Данлы Дусай» исемендәге китап дөнья күрде. Китапны Нәҗибә Батыршинаның «Мөслим икмәге» кибетеннән сатып алырга була.

 

Бәйге үтте

28 апрель көнне Иске Карамалы Мәдәният йортында якташыбыз Харрас Әюп истәлегенә  багышланган  районкүләм шигырь язучылар бәйгесе үтте.Аның төп оештыручысы — Иске Карамалы  китапханәчесе, Татарстан журналистлар берлеге әгъзасы Гөлназ Шәмси. Бәйге җиңүчеләре Мактау кәгазьләре, дипломнар, кыйммәтле бүләкләргә лаек булды.Бәйгедән кайбер кадрлар:

Учымда — синең җылың

Күптән түгел якташыбыз, яшь шагыйрә Лилия Шәймиеваның Казан шәһәрендә «Учымда — синең җылың» исемле шигырьләр җыентыгы басылып чыкты. Бу инде аның икенче китабы.Китап бары тик лирик шигырьләрдән генә тора.Китап укучылар тарафыннан яратып кабул ителер, дигән теләктә калабыз.Авторга яңа иҗат уңышлары, саулык — сәламәтлек телибез.

 

Фәтхулла абыйга — 80

22 март көнне  Түбән Камада якташ язучыбыз  Фәтхулла Абдуллинга 80 яшь, иҗатына  50 ел тулу уңаеннан «Бу дөньяга без килгәнбез икән…» дигән әдәби — музыкаль кичә булды.Шул кичәдән кайбер мизгелләр тәкъдим итәбез.

            

Татарстан Язучылар берлегендә

Татарстан Язучылар берлегенең Әдәби ел йомгаклары ясады
16 декабрьдә «Казан» милли-мәдәни үзәгендә Татарстан Язучылар берлегенең Әдәби ел йомгакларына багышланган гомуми җыелышы булды. Җыелышта 2017 елда әдәбиятнең төрле жанрларында иҗат ителгән әсәрләргә күзәтү ясалды, докладлар буенча фикер алышулар булды, әдәби премияләр, Берлеккә яңа алынган әгъзаларга кенәгәләр тапшырылды, конкурсларга йомгак ясалды.

Татар әдәбиятын һәм сәнгатен үстерүгә зур өлеш кертүе өчен Язучы Фоат Миңнеәхмәт улы Садриевка Татарстан Республикасы Президентының Рәхмәт сүзе тапшырылды

Нәтиҗәле хезмәте һәм татар әдәбиятын үстерүгә лаеклы өлеш керткәне өчен язучы Факил Миңнемөхәммәт улы Сафин Татарстан Республикасы Мәдәният министрлыгының “Мәдәнияттәге казанышлары өчен” билгесе белән бүләкләнде

Шагыйрә Лилия Садриевага Татарсттан Язучылар берлеге таныклыгы тапшырылды.

Мөслимдә татар әдәбияты һәм сәнгате көннәре

14, 15 нче сентябрь көннәрендә Мөслимдә  татар әдәбияты һәм сәнгате көннәре билгеләп үтелде. Бу чара күренекле якташ шагыйрьләребезТатарстанның атказанган сәнгать эшлеклесе, республиканың Тукай бүләге иясе Зөлфәтнең һәм Татарстанның атказанган мәдәният хезмәткәре Наис Гамбәрнең 70 яшьлек юбилей даталарына  багышланган иде. Казан, Чаллы , Әлмәт шәһәрләреннән 20 гә якын кунак килде.Алар районыбызның  яңа төзелгән объектларында, мәктәпләрдә, «Кояшлы Ык» зонасында булдылар, төрле чараларда катнаштылар.

Татарстанның Халык шагыйре Роберт Миңнуллинның Мөслимебезгә багышланган шигырен тәкъдим итәбез.

Мөслимгә китеп барабыз…
 
Мөслимгә китеп барабыз,
Мең тапкыр булган якка,
Берсеннән-берсе талантлы
Шагыйрьләр туган якка!..
 
Мөслимнәр алар алдыра
Күңел белән, сүз белән.
Алар матурлыкларга да
Карый башка күз белән…
 
Башкаларга караганда
Алар күпкә хислерәк.
Мөслимнәрнең һәркайсысы
Җырчы, шагыйрь төслерәк!
 
Мөслимнәрнең кояшында
Кем генә кызынманган?
Мөслим халкы табигыйрәк,
Әлегә бозылмаган.
 
Мөслимнең кешеләре дә
Ихласрак, беркатлырак.
Егетләре дә тапкыррак,
Кызлары да татлырак…
 
Әллә каян ук күренә
Аларның мөслимлеге.
Ә мөслимлек мөслимнәрнең,
Әлбәттә, өстенлеге!..
 
Мөслимгә китеп барабыз…
Очып барабыз инде!
Мөслим бик үзгәргән, диләр…
Баргач, карарбыз инде!
 
Үзгәргәндер, үзгәрсә дә
Калыр ул үзе булып,
Татар шигыренең сүзе,
Милләтнең йөзе булып…
 
Мөслим тагын да яктырыр
Безнең якты теләктән…
Мөслимнеке булмасам да,
Мин дә шушы төбәктән!
14.09.17